മുൻ മുഖ്യമന്ത്രി പിണറായി വിജയന്റെ വസതിയില് റെയ്ഡിനെത്തിയ എൻഫോഴ്സ്മെന്റ് ഡയറക്ടറേറ്റ് (ഇഡി) ഉദ്യോഗസ്ഥരെ ആക്രമിച്ച കേസില് പ്രതികളുടെ ജാമ്യാപേക്ഷ തിരുവനന്തപുരം ജില്ലാ കോടതി ഇന്ന് പരിഗണിക്കും.സിപിഎം പ്രവർത്തകരായ ഒമ്പത് പേരുടെ ജാമ്യാപേക്ഷയാണ് കോടതിയുടെ പരിഗണനയിലുള്ളത്.പ്രതികള്ക്ക് ജാമ്യം നല്കുന്നതിനെ പ്രോസിക്യൂഷനും ഇഡിയും ശക്തമായി എതിർത്തിട്ടുണ്ട്. കൂടാതെ, ഇഡി ഉദ്യോഗസ്ഥരെ ആക്രമിക്കുന്നതിന്റെ ദൃശ്യങ്ങള് പരിശോധിക്കണമെന്ന പ്രോസിക്യൂഷന്റെ ആവശ്യവും കോടതി ഇന്ന് പരിശോധിക്കും.നേരത്തെ, ഐ.പി. ബിനു ഉള്പ്പെടെയുള്ള 10 പ്രതികളുടെ ജാമ്യാപേക്ഷ കോടതി തള്ളിയിരുന്നു. പ്രതികള്ക്ക് ജാമ്യം അനുവദിച്ചാല് അത് അന്വേഷണത്തെ ബാധിക്കുമെന്നും, പ്രതികള് രാജ്യം വിടാനും സാക്ഷികളെ സ്വാധീനിക്കാനും സാധ്യതയുണ്ടെന്നും കോടതി അന്നത്തെ ഉത്തരവില് ചൂണ്ടിക്കാണിച്ചിരുന്നു. എന്നാല് തങ്ങളെ കസ്റ്റഡിയില് വെച്ച് ഇനി കൂടുതല് അന്വേഷണം നടത്തേണ്ടതില്ലെന്നായിരുന്നു പ്രതിഭാഗത്തിന്റെ വാദം.പിണറായി വിജയന്റെ മകള് ടി. വീണയുടെ വീട്ടില് ഇഡി നടത്തിയ പരിശോധനയ്ക്കിടെയാണ് കേസിനാസ്പദമായ സംഭവങ്ങള് അരങ്ങേറിയത്. റെയ്ഡ് വിവരമറിഞ്ഞ് പ്രതിഷേധവുമായി സ്ഥലത്തെത്തിയ സിപിഎം പ്രവർത്തകർ അന്വേഷണ ഉദ്യോഗസ്ഥരുടെ ഔദ്യോഗിക കൃത്യനിർവഹണം തടസ്സപ്പെടുത്തുകയും കയ്യേറ്റം ചെയ്യുകയും ചെയ്തുവെന്നാണ് കേസ്. തുടർന്ന് പാളയം ലോക്കല് സെക്രട്ടറി ഐ.പി. ബിനു അടക്കമുള്ളവർക്കെതിരെ പൊലീസ് കേസെടുക്കുകയായിരുന്നു.
ഇഡി ഉദ്യോഗസ്ഥരെ ആക്രമിച്ച കേസ്, പ്രതികളുടെ ജാമ്യാപേക്ഷ തിരുവനന്തപുരം ജില്ലാ കോടതി ഇന്ന് പരിഗണിക്കും
