ലൈംഗികാതിക്രമ കേസ്: തെഹൽക്ക മുൻ എഡിറ്റർ തരുൺ തേജ്പാൽ ഗോവ കോടതിയിൽ കീഴടങ്ങി

മാപ്പുസ (ഗോവ): 2013-ലെ ലൈംഗികാതിക്രമ കേസിൽ തെഹൽക്ക മുൻ എഡിറ്റർ ഇൻ ചീഫ് തരുൺ തേജ്പാൽ വടക്കൻ ഗോവ സെഷൻസ് കോടതിയിൽ (മാപ്പുസ) കീഴടങ്ങി. ബോംബെ ഹൈക്കോടതി വിധിച്ച 10 വർഷത്തെ കഠിനതടവ് അനുഭവിക്കുന്നതിനായി തരുണിനെ കൊൾവാലെയിലുള്ള സെൻട്രൽ ജയിലിലേക്ക് മാറ്റി.2013-ൽ ഗോവയിലെ ഒരു ഹോട്ടൽ ലിഫ്റ്റിൽവെച്ച് തരുൺ തേജ്പാൽ ലൈംഗികാതിക്രമം നടത്തിയെന്നാരോപിച്ച് ജൂനിയറായ സഹപ്രവർത്തക നൽകിയ പരാതിയിലാണ് നടപടി. വിചാരണക്കോടതി തേജ്പാലിനെ വെറുതെവിട്ടിരുന്നെങ്കിലും ആ ഉത്തരവ് ബോംബെ ഹൈക്കോടതി ഓഗസ്റ്റിൽ റദ്ദാക്കിയിരുന്നു. ബോംബെ ഹൈക്കോടതി ബെഞ്ച് തരുണിനെ കുറ്റക്കാരനായി കണ്ടെത്തുകയും 10 വർഷത്തെ തടവിന് ശിക്ഷിക്കുകയുമായിരുന്നു. കേസിൽ കീഴടങ്ങുന്നതിൽനിന്ന് ഇളവ് വേണമെന്ന തേജ്പാലിന്റെ ഹർജി സുപ്രീം കോടതി തള്ളിയിരുന്നു. തിങ്കളാഴ്ച പൊതു അവധിയാണെന്ന് ചൂണ്ടിക്കാട്ടി കീഴടങ്ങൽ നീട്ടിവെക്കണമെന്ന് ആവശ്യപ്പെട്ട് നൽകിയ ഹർജി വടക്കൻ ഗോവ സെഷൻസ് കോടതി തള്ളിയതിനുപിന്നാലെയാണ് കീഴടങ്ങിയത്.ഇന്ത്യൻ ശിക്ഷാ നിയമത്തിലെ (IPC) 376(2), 354, 354A, 354B, 342 തുടങ്ങിയ വകുപ്പുകൾ പ്രകാരമാണ് ശിക്ഷ വിധിച്ചിട്ടുള്ളത്. ശിക്ഷകൾ ഒരുമിച്ച് അനുഭവിച്ചാൽ മതിയെന്നതിനാൽ തേജ്പാൽ 10 വർഷം തടവിൽ കഴിയേണ്ടിവരും. അതിനിടെ, കേസിൽ സുപ്രീം കോടതിയെ സമീപിച്ചിട്ടുണ്ടെന്നും നീതി ലഭിക്കുമെന്ന ഉറപ്പുണ്ടെന്നും തേജ്പാൽ പ്രതികരിച്ചു.