പൊലീസ് അസോസിയേഷൻ സംഘടനകളുടെ പുനക്രമീകരണത്തില്‍ സർക്കാരിന് ഹൈക്കോടതിയില്‍ ആശ്വാസം. ആഭ്യന്തര വകുപ്പിന്‍റെ ഉത്തരവ് റദ്ദാക്കിയ സിംഗിള്‍ ബെഞ്ച് നടപടി ഹൈക്കോടതി ഡിവിഷൻ ബെഞ്ച് റദ്ദാക്കി.സംഘടനകളെ മൂന്നില്‍ നിന്ന് രണ്ടാക്കാനുള്ള സർക്കാർ നടപടി സംഘടിക്കാനുള്ള മൗലികാവകാശങ്ങള്‍ ലംഘിക്കുന്നില്ലെന്നും ഏതെങ്കിലും അസോസിയേഷനില്‍ പ്രവർത്തിക്കാൻ എല്ലാവർക്കും കഴിയുമെന്നുമുള്ള സർക്കാർ വാദം ഡിവിഷൻ ബെഞ്ച് അംഗീകരിച്ചു.സർക്കാർ നിയോഗിച്ച അഡ്ഹോക്ക് കമ്മിറ്റി അംഗം ജി ആർ അജിത് നല്‍കിയ അപ്പീലിലാണ് ജസ്റ്റിസ് ജയശങ്കരൻ നമ്പ്യാർ, ജസ്റ്റിസ് എ കെ പ്രീത എന്നിവർ അടങ്ങുന്ന ഡിവിഷൻ ബെഞ്ചിന്‍റെ ഉത്തരവ്. സർക്കാർ നീക്കം സംഘടിക്കാനുള്ള അവകാശത്തിൻമേലുള്ള ഇടപെടലാണെന്ന് വിലയിരുത്തിയാണ് നേരത്തെ സിംഗിള്‍ ബെഞ്ച് ആഭ്യന്തര വകുപ്പ് ഉത്തരവ് റദ്ദാക്കിയത്.മൂന്ന് പൊലീസ് സംഘടനകളില്‍ ഒന്നിനെ ഇല്ലാതാക്കി രണ്ട് സംഘടനകളായാണ് പൊലീസ് അസോസിയേഷനുകളെ പുന:സംഘടിപ്പിച്ചത്. സിവില്‍ പൊലീസ് ഓഫീസര്‍ മുതല്‍ ഗ്രേഡ് എസ്‌ഐ വരെയുള്ളവര്‍ പൊലീസ് അസോസിയേഷന്റെ ഭാഗമായിട്ടും എസ്‌ഐ മുതല്‍ നോണ്‍ ഐപിഎസ് എസ്പി വരെയുള്ളവര്‍ കേരള പൊലീസ് സീനിയര്‍ ഓഫീസേഴ്‌സ് അസോസിയേഷനില്‍ ഉള്‍പ്പെടുന്ന രീതിയിലുമാണ് പുന:ക്രമീകരണം. നിര്‍ത്തലാക്കിയ സംഘടനയുടെ ആസ്തി 60 – 40 അനുപാതത്തില്‍ രണ്ട് സംഘടനകള്‍ക്കുമായി വീതിച്ചു നല്‍കാനും സര്‍ക്കാർ തീരുമാനിച്ചു.
പൊലീസ് സംഘടനകളുടെ പുനഃക്രമീകരണം; സര്‍ക്കാരിന് ആശ്വാസം, സിംഗിള്‍ ബെഞ്ച് നടപടി റദ്ദാക്കി ഡിവിഷൻ ബെഞ്ച്
