ന്യൂഡൽഹി: കുടുംബവഴക്കിനിടെ ഭർത്താവിനെ കുത്തിക്കൊന്ന കേസിൽ യുവതിയുടെ ശിക്ഷ 500 രൂപ പിഴയായി ചുരുക്കി തെലങ്കാന ഹൈക്കോടതി. വിചാരണക്കോടതി നേരത്തെ വിധിച്ച നാല് വർഷത്തെ കഠിനതടവ് ഒഴിവാക്കിയാണ് ഹൈക്കോടതിയുടെ ഈ അസാധാരണ ഉത്തരവ്.യുവതിയുടെ മാതാപിതാക്കളുടെ വീട്ടിൽ വെച്ചാണ് സംഭവം നടന്നത്. കുട്ടികൾക്ക് ഈന്തപ്പഴം നൽകാനായി എത്തിയതായിരുന്നു ഭർത്താവ്. അവിടെവെച്ച് ഇരുവരും തമ്മിൽ വാക്കേറ്റമുണ്ടാവുകയും ഭർത്താവ് പുറത്തുപോവുകയും ചെയ്തു. എന്നാൽ പിന്നീട് വിവസ്ത്രനായി തിരിച്ചെത്തിയ ഇയാൾ യുവതിയെയും കുടുംബത്തെയും അസഭ്യം പറയുകയും ഭീഷണിപ്പെടുത്തുകയും ചെയ്തു. ഈ പ്രകോപനത്തിൽ പ്രകോപിതയായ യുവതി, കയ്യിൽ കിട്ടിയ കത്തി ഉപയോഗിച്ച് ഭർത്താവിനെ കുത്തുകയായിരുന്നു. ഈ മുറിവാണ് മരണത്തിന് കാരണമായത്.ആദ്യം ഇന്ത്യൻ ശിക്ഷാനിയമം സെക്ഷൻ 302 പ്രകാരം കൊലക്കുറ്റമാണ് യുവതിക്കെതിരെ ചുമത്തിയിരുന്നത്. എന്നാൽ, കൊലപ്പെടുത്തണമെന്ന മുൻകൂട്ടിയുള്ള ആസൂത്രണമോ വ്യക്തമായ ഉദ്ദേശ്യമോ ഉണ്ടായിരുന്നതിന് തെളിവില്ലാത്തതിനാൽ ഈ സംഭവം കൊലപാതകത്തിന്റെ പരിധിയിൽ വരില്ലെന്ന് വിചാരണക്കോടതി വിലയിരുത്തി. പകരം, കൊലപാതകമല്ലാത്ത നരഹത്യയുമായി ബന്ധപ്പെട്ട ഐപിസി സെക്ഷൻ 304 പാർട്ട് II പ്രകാരം യുവതി കുറ്റക്കാരിയാണെന്ന് കണ്ടെത്തുകയും, നാല് വർഷത്തെ കഠിനതടവിനും 500 രൂപ പിഴയ്ക്കും ശിക്ഷിക്കുകയുമായിരുന്നു. അതിൽ നിന്നാണ് ഇപ്പോൾ ഹൈക്കോടതി തടവുശിക്ഷ പൂർണ്ണമായി ഒഴിവാക്കി നൽകിയത്.വിചാരണക്കോടതി യുവതിക്ക് നാല് വർഷത്തെ തടവും 500 രൂപ പിഴയുമാണ് വിധിച്ചിരുന്നത്. എന്നാൽ യുവതി നൽകിയ അപ്പീൽ പരിഗണിച്ച ഹൈക്കോടതി, സംഭവസമയത്ത് ഭർത്താവിന്റെ ഭാഗത്തുനിന്നുണ്ടായ കടുത്ത അധിക്ഷേപങ്ങളും ഭീഷണികളും കണക്കിലെടുത്തു. യുവതിക്ക് മേൽ ഇനിയും തടവുശിക്ഷ നൽകുന്നത് ഉചിതമല്ലെന്ന് വിലയിരുത്തിയ കോടതി, ശിക്ഷ 500 രൂപ പിഴ മാത്രമായി നിജപ്പെടുത്തുകയായിരുന്നു. വിചാരണക്കോടതി വിധിച്ച ഈ പിഴത്തുക യുവതി നേരത്തെ തന്നെ അടച്ചിരുന്നു.പെട്ടെന്നുണ്ടാകുന്ന വഴക്കിൽ നടക്കുന്ന എല്ലാ കൊലപാതകങ്ങൾക്കും ഈ ഇളവ് ലഭിക്കില്ലെന്ന് ഹൈക്കോടതി വ്യക്തമാക്കി. ഉപയോഗിച്ച ആയുധത്തിന്റെ സ്വഭാവം, ആക്രമണത്തിന്റെ തീവ്രത, പ്രതിയുടെ ഭാഗത്തുനിന്നുണ്ടായ പ്രതികരണം എന്നിവയെല്ലാം പരിശോധിച്ച ശേഷമേ കോടതികൾ ഇത്തരം തീരുമാനമെടുക്കൂ. കൊലപ്പെടുത്തണമെന്ന വ്യക്തമായ ഉദ്ദേശ്യത്തോടെയാണ് ആക്രമണം നടത്തുന്നതെങ്കിൽ അത് ജീവപര്യന്തം തടവ് ലഭിക്കാവുന്ന കൊലക്കുറ്റമായി തന്നെ തുടരുമെന്നും കോടതി വ്യക്തമാക്കി.
ഭര്ത്താവിനെ കുത്തിക്കൊന്ന കേസില് യുവതിക്ക് 500 രൂപ മാത്രം പിഴ വിധിച്ച് ഹൈക്കോടതി
