ഒരു രാജ്യം ഒരു തിരഞ്ഞെടുപ്പ് ബില്ലില്‍ ജെപിസിയുമായുള്ള കൂടിക്കാഴ്ച നിരസിച്ച്‌ സുപ്രീം കോടതി. തീരുമാനം സുപ്രിംകോടതി ജെപിസിയെ അറിയിച്ചു.ഭാവിയില്‍ സുപ്രിംകോടതിയില്‍ ഹർജി വരാനുള്ള സാധ്യതയുള്ളതിനാല്‍ കൂടിക്കാഴ്ച ഉചിതമല്ലെന്ന് പ്രതിപക്ഷവും നിലപാടെടുത്തിരുന്നു. തീരുമാനം ജെപിസിയെ രേഖാമൂലം അറിയിച്ച്‌ സുപ്രീം കോടതി സെക്രട്ടറി ജനറല്‍. ഇതോടെ ചീഫ് ജസ്റ്റിസും മുതിർന്ന ജഡ്ജിമാരുമായി ജെപിസി ഒക്ടോബർ 6-ന് നടത്താനിരുന്ന കൂടിക്കാഴ്ച റദ്ദാക്കി.സുപ്രീം കോടതി ജഡ്ജിമാരെ കാണാനുള്ള കമ്മിറ്റിയുടെ നീക്കത്തെ, അധികാര വിഭജനത്തിന്റെ ലംഘനമാണെന്ന് ചൂണ്ടിക്കാട്ടി മുതിർന്ന അഭിഭാഷകൻ കപില്‍ സിബല്‍ വിമർശിച്ചിരുന്നു. രാജ്യത്തിന്റെ ചരിത്രത്തില്‍ ഇത്തരമൊരു യോഗം ഇതുവരെ നടന്നിട്ടില്ലെന്ന് സിബല്‍ പറഞ്ഞു. ഒരേസമയം തിരഞ്ഞെടുപ്പ് നടത്തുന്നതിന് വഴിയൊരുക്കുന്ന ‘ഭരണഘടന ബില്‍, 2024’, ‘കേന്ദ്രഭരണപ്രദേശ നിയമങ്ങള്‍ (ഭേദഗതി) ബില്‍, 2024’ എന്നിവ സംയുക്ത പാർലമെന്ററി സമിതി പരിശോധിച്ചുവരികയാണ്.ബിജെപി എംപി പി.പി. ചൗധരിയുടെ നേതൃത്വത്തിലുള്ള സമിതി, രണ്ട് ബില്ലുകളെക്കുറിച്ചുള്ള പരിശോധനയുടെ ഭാഗമായി രാഷ്ട്രീയ പാർട്ടികള്‍, ജനപ്രതിനിധികള്‍, ഭരണഘടനാ വിദഗ്ധർ, മറ്റ് ബന്ധപ്പെട്ട കക്ഷികള്‍ എന്നിവരുമായി ചർച്ചകള്‍ നടത്തിവരികയാണ്. ഒരേസമയം തിരഞ്ഞെടുപ്പ് നടത്തുന്നതുമായി ബന്ധപ്പെട്ട ഭരണഘടനാപരമായ വശങ്ങളെക്കുറിച്ച്‌ ഇന്ത്യയിലെ മുൻ ചീഫ് ജസ്റ്റിസുമാർ, മുൻ സുപ്രീം കോടതി ജഡ്ജിമാർ, മറ്റ് നിയമവിദഗ്ധർ എന്നിവരുമായും കൂടിയാലോചനകള്‍ നടത്തിയിട്ടുണ്ടെന്ന് സമിതി നേരത്തെ വ്യക്തമാക്കിയിരുന്നു.
ഒരു രാജ്യം ഒരു തിരഞ്ഞെടുപ്പ് ബില്‍; ജെപിസിയുമായുള്ള കൂടിക്കാഴ്ച നിരസിച്ച്‌ സുപ്രീംകോടതി
