ഓണ്‍ലൈൻ വാർത്താ പോർട്ടലായ ന്യൂസ്‌ക്ലിക്കിനും അതിന്‍റെ സ്ഥാപക എഡിറ്റർ പ്രബീർ പുരകായസ്ഥയ്ക്കും എതിരെയുള്ള കള്ളപ്പണം വെളുപ്പിക്കല്‍ കേസ് റദ്ദാക്കിയ ഡല്‍ഹി ഹൈക്കോടതി ഉത്തരവിനെതിരെ എൻഫോഴ്സ്മെന്റ് ഡയറക്ടറേറ്റ് സുപ്രീം കോടതിയെ സമീപിച്ചു.വിദേശ നിക്ഷേപ ചട്ടങ്ങള്‍ ലംഘിച്ചുവെന്ന ആരോപണത്തില്‍ ഡല്‍ഹി പോലീസിന്‍റെ ഇക്കണോമിക് ഒഫൻസസ് വിംഗ് രജിസ്റ്റർ ചെയ്ത എഫ്‌ഐആറും, അതിന്‍റെ അടിസ്ഥാനത്തില്‍ ഇഡി എടുത്ത കള്ളപ്പണം വെളുപ്പിക്കല്‍ തടയല്‍ നിയമപ്രകാരമുള്ള കേസും ഡല്‍ഹി ഹൈക്കോടതി റദ്ദാക്കിയിരുന്നു.സാമ്പത്തിക കുറ്റകൃത്യങ്ങളും ആരോപണങ്ങളും കൃത്യമായി പരിശോധിക്കാതെയാണ് ഹൈക്കോടതി കേസ് റദ്ദാക്കിയതെന്ന് ഇഡി സുപ്രീം കോടതിയില്‍ നല്‍കിയ ഹർജിയില്‍ ആരോപിക്കുന്നു. കൂടാതെ വാദം പൂർത്തിയായി ആറു മാസത്തിനു ശേഷമാണ് ഹൈക്കോടതി വിധി പ്രസ്താവിച്ചതെന്നും ഇത് പ്രധാന തെളിവുകള്‍ വിസ്മരിക്കപ്പെടാൻ ഇടയാക്കിയെന്നും ഇഡി ചൂണ്ടിക്കാണിക്കുന്നു.
‘സാമ്പത്തിക കുറ്റകൃത്യങ്ങള്‍ കൃത്യമായി പരിശോധിച്ചില്ല’, പ്രബീര്‍ പുരകായസ്ഥയ്ക്കെതിരായ കേസ് റദ്ദാക്കിയ ഡല്‍ഹി ഹൈക്കോടതി ഉത്തരവിനെതിരെ ഇഡി സുപ്രീം കോടതിയില്‍
