ബോഡി ബിൽഡർമാരുടെ ഇൻസ്‌പെക്ടർ നിയമനം: ചീഫ് സെക്രട്ടറിക്കെതിരെ ആഞ്ഞടിച്ച് ഹൈക്കോടതി

സംസ്ഥാനത്ത് ഏറെ വിവാദമായ ബോഡി ബിൽഡർമാരുടെ പോലീസ് ഇൻസ്പെക്ടർ നിയമനത്തിൽ സർക്കാരിനും ചീഫ് സെക്രട്ടറിക്കുമെതിരെ ഹൈക്കോടതിയുടെ രൂക്ഷ വിമർശനം. വഴിവിട്ട് എന്തും ചെയ്യാൻ മടിക്കാത്ത ആളാണ് ചീഫ് സെക്രട്ടറിയെന്നും മന്ത്രിമാർക്ക് ചെയ്യാൻ കഴിയാത്ത കാര്യങ്ങൾ പോലും ചീഫ് സെക്രട്ടറി ചെയ്യുമെന്നും ജസ്റ്റിസ് ബദറുദ്ദീൻ തുറന്നടിച്ചു. ഇക്കാര്യത്തിൽ കോടതിയെക്കൊണ്ട് കൂടുതൽ ഒന്നും പറയിപ്പിക്കരുതെന്നും ഹൈക്കോടതി മുന്നറിയിപ്പ് നൽകി. ബോഡി ബിൽഡർമാരുടെ പോലീസിലെ നിയമനവുമായി ബന്ധപ്പെട്ട് അഡ്വക്കറ്റ് കെ.എം ഷാജഹാൻ നൽകിയ ഹർജി പരിഗണിക്കവെയാണ് ഉന്നത ഉദ്യോഗസ്ഥർക്കെതിരെ കോടതി കടുത്ത പരാമർശങ്ങൾ നടത്തിയത്. സർക്കാരിന് വേണ്ടി ഡയറക്ടർ ജനറൽ ഓഫ് പ്രോസിക്യൂഷൻ ടി. ആസിഫലി വാദങ്ങൾ അവതരിപ്പിച്ചപ്പോഴാണ് കോടതി ഇടപെട്ട് നിർണ്ണായക ചോദ്യങ്ങൾ ഉന്നയിച്ചത്.മന്ത്രിസഭാ തീരുമാനപ്രകാരമാണ് നിയമനം നടന്നതെന്ന ഡി.ജി.പിയുടെ വാദത്തിൽ, ഫിസിക്കൽ ടെസ്റ്റിൽ പരാജയപ്പെട്ടവരെ നിയമിക്കാൻ മന്ത്രിസഭ തീരുമാനിച്ചിരുന്നോ എന്നും നിയമനം ചട്ടങ്ങൾ ലംഘിച്ചല്ലേ നടന്നതെന്നും കോടതി ചോദിച്ചു. കായിക താരങ്ങളെ ആദരിക്കാനാണ് നിയമനം നൽകിയതെന്ന സർക്കാരിന്റെ വിശദീകരണവും കോടതി നിശിതമായി വിമർശിച്ചു. താരങ്ങളെ ആദരിക്കാൻ മറ്റ് വകുപ്പുകളിൽ ജോലി നൽകാതെ ഫിറ്റ്നസ് ഏറ്റവും നിർബന്ധമുള്ള സായുധ പോലീസിൽ തന്നെ എന്തിന് നിയമനം നൽകിയെന്ന് കോടതി ആരാഞ്ഞു. ഈ നിയമനം ഉദ്യോഗസ്ഥരുടെ തീരുമാനപ്രകാരമല്ലേ നടന്നതെന്ന് ചോദിച്ച കോടതി, ഇതിൽ വിജിലൻസ് അന്വേഷണം വേണ്ടിവരുമെന്നും വ്യക്തമാക്കി. കൂടാതെ, നിയമനം ലഭിച്ച ഷിനു ചൊവ്വയുടെ അന്താരാഷ്ട്ര മത്സരങ്ങളിലെ വിജയമാണ് യോഗ്യതയെന്ന വാദവും കോടതി തള്ളി. വിദേശ രാജ്യങ്ങളിൽ നിന്നുള്ളവർ പങ്കെടുത്തു എന്ന കാരണത്താൽ മാത്രം ഒരു മത്സരം അംഗീകൃതമാകില്ലെന്നും ഇക്കാര്യം വിശദമായി പരിശോധിക്കേണ്ടതുണ്ടെന്നും കോടതി നിരീക്ഷിച്ചു