എസ്‌എൻഡിപി തെരഞ്ഞെടുപ്പ്; വെള്ളാപ്പള്ളി നടേശന് അനുകൂലമായി കേന്ദ്ര സര്‍ക്കാര്‍ സുപ്രീം കോടതിയില്‍

എസ്‌എന്‍ഡിപി യോഗം തെരഞ്ഞെടുപ്പു കേസില്‍ വെള്ളാപ്പള്ളി നടേശൻ വിഭാഗത്തിന് അനുകൂല റിപ്പോര്‍ട്ടുമായി കേന്ദ്ര സര്‍ക്കാര്‍.വെള്ളാപ്പള്ളി നടേശന്‍റെ വാദം ശരിവയ്ക്കുന്ന നിലപാട് കേന്ദ്രം സുപ്രീം കോടതിയെ അറിയിച്ചു. സംസ്ഥാന കമ്പനി നിയമം എസ്.എൻ.ഡി.പിക്ക് ബാധകമല്ലെന്ന കമ്പനി കാര്യമന്ത്രാലയത്തിന്റെ റിപ്പോർട്ടാണ് കേന്ദ്രം സുപ്രീം കോടതിയില്‍ നല്‍കിയത്. 1961ലെ കേരള നോണ്‍ ട്രേഡിംഗ് കമ്പനീസ് ആക്‌ട് എസ്.എൻ.ഡി.പി. യോഗത്തിന് ബാധകമല്ല. എസ്.എൻ.ഡി.പി യോഗം 2013ലെ കേന്ദ്ര കമ്പനി നിയമത്തിന് കീഴിലെന്നും കേന്ദ്രം വ്യക്തമാക്കുന്നു.1974ല്‍ ഇരൂന്നൂറ് അംഗങ്ങള്‍ക്ക് ഒരു പ്രതിനിധിയെന്ന വോട്ടിംഗ് രീതിക്ക് അനുവദിച്ച ഇളവ് ഇപ്പോഴും ബാധകമാണെന്നും കമ്പനികാര്യ മന്ത്രാലയത്തിലെ അഡിഷണല്‍ സെക്രട്ടറി അംശുമാൻ പട്നായിക്കിന്റെ റിപ്പോർട്ടില്‍ പറയുന്നു. പ്രാതിനിധ്യ വോട്ടവകാശം അംഗീകരിക്കുന്നതാണ് കമ്പനി കാര്യ മന്ത്രാലയത്തിന്റെ റിപ്പോര്‍ട്ട്. തെരഞ്ഞെടുപ്പ് കേസില്‍ വെളളാപ്പള്ളി നടേശന് റിപ്പോര്‍ട്ട് അനുകൂലമാവും. എസ്.എൻ.ഡി.പിക്ക് സംസ്ഥാന നിയമമാണ് ബാധകമാവുകയെന്ന് ഹര്‍ജിക്കാര്‍ വാദിച്ചു. പ്രാതിനിധ്യ വോട്ടവകാശം റദ്ദാക്കണമെന്ന ഹർജിയില്‍ സുപ്രീംകോടതി വാദം കേള്‍ക്കും. ഹര്‍ജി രണ്ടാഴ്ചയ്ക്കുശേഷം പരിഗണിക്കാൻ മാറ്റി. സംസ്ഥാന സർക്കാർ സമയം ചോദിച്ചതോടെയാണ് കേസ് മാറ്റിയത്.

Leave a Reply

Your email address will not be published. Required fields are marked *