പ്രണയത്തിന് മുന്നിൽ വഴിമാറി നിയമം; ബൊളീവിയയിൽ ആദ്യ നിയമപരമായ സ്വവർഗ വിവാഹത്തിന് അംഗീകാരം

വർഷങ്ങൾ നീണ്ട നിയമപോരാട്ടങ്ങൾക്കൊടുവിൽ ചരിത്രനേട്ടവുമായി ദക്ഷിണ അമേരിക്കൻ രാജ്യമായ ബൊളീവിയ. രാജ്യത്തെ ആദ്യ നിയമപരമായ സ്വവർഗ വിവാഹത്തിന് ഔദ്യോഗിക അംഗീകാരം ലഭിച്ചു. ഫാബിയാന ജസ്റ്റിനിയാനോയും സ്‌കാർലെറ്റ് റോച്ചയും തമ്മിലുള്ള വിവാഹമാണ് ബൊളീവിയയുടെ നിയമചരിത്രത്തിൽ പുതിയ അധ്യായത്തിന് തുടക്കമിട്ടത്.2022 ഒക്ടോബറിലാണ് വിവാഹ രജിസ്ട്രേഷനായി ഫാബിയാനയും സ്‌കാർലെറ്റും അപേക്ഷ നൽകിയത്. എന്നാൽ രാജ്യത്തെ ശക്തമായ യാഥാസ്ഥിതിക നിലപാടുകളും നിയമപരമായ തടസ്സങ്ങളും ഇവരുടെ മുന്നോട്ടുള്ള യാത്ര ദുഷ്കരമാക്കി. എതിർപ്പുകൾക്കിടയിലും നിയമപോരാട്ടം തുടർന്ന ഇരുവർക്കും 2026 മാർച്ചിൽ അനുകൂലമായ ചരിത്രവിധി ലഭിച്ചു.ബൊളീവിയയിലെ എൽ.ജി.ബി.ടി.ക്യൂ+ അവകാശ പോരാട്ടങ്ങൾക്ക് പുതിയ ദിശ നൽകുന്നതാണ് ഈ വിധിയെന്നാണ് അവകാശ പ്രവർത്തകരുടെ വിലയിരുത്തൽ. വിവാഹത്തിലൂടെ ലഭിക്കുന്ന നിയമപരമായ അവകാശങ്ങളും സംരക്ഷണങ്ങളും സ്വവർഗ ദമ്പതികൾക്കും ഉറപ്പാക്കുന്നതിനുള്ള നിർണായക ചുവടുവയ്പ്പായാണ് വിധിയെ കാണുന്നത്.ഇതിന് മുൻപായി 2020-ൽ ഡേവിഡ്, ഗ്വിഡോ മൊണ്ടാനോ എന്നിവരുടെ ദീർഘകാല നിയമപോരാട്ടത്തെ തുടർന്ന് ബൊളീവിയയിൽ സ്വവർഗ സിവിൽ യൂണിയനുകൾക്ക് നിയമപരമായ അംഗീകാരത്തിലേക്കുള്ള വഴി തുറന്നിരുന്നു. തുടർന്ന് 2023-ലെ കോടതി ഉത്തരവിന്റെ അടിസ്ഥാനത്തിൽ രാജ്യത്ത് ഇതുവരെ 148 സ്വവർഗ സിവിൽ യൂണിയനുകൾ രജിസ്റ്റർ ചെയ്തിട്ടുണ്ട്.എന്നാൽ സിവിൽ യൂണിയനുകളേക്കാൾ വിപുലമായ നിയമപരിരക്ഷയും തുല്യാവകാശങ്ങളും പൂർണ്ണമായ വിവാഹബന്ധത്തിലൂടെയാണ് ലഭിക്കുന്നതെന്ന് അവകാശ പ്രവർത്തകർ ചൂണ്ടിക്കാട്ടുന്നു. സിവിൽ യൂണിയനുകൾക്ക് അംഗീകാരം ലഭിച്ചതോടെ ഒരു വാതിൽ തുറന്നെങ്കിലും, വിവാഹത്തിന് നിയമപരമായ അംഗീകാരം ലഭിച്ചതോടെ കൂടുതൽ വലിയ തുല്യതയിലേക്കുള്ള വഴിയാണ് തുറന്നതെന്ന് ഡേവിഡ് മൊണ്ടാനോ പ്രതികരിച്ചു.ചരിത്രവിധിക്ക് പിന്നാലെ സമാനമായ നിയമപരിരക്ഷ ആവശ്യപ്പെട്ട് നിരവധി സ്വവർഗ ദമ്പതികൾ സമീപിച്ചതായും അഭിഭാഷകർ വ്യക്തമാക്കി. ‘ഇക്വൽ ബൊളീവിയ’ സംഘടനയ്ക്ക് കീഴിൽ കേസ് നടത്തിയ അഭിഭാഷകൻ മാറ്റിയോ റോഡ്രിഗോയുടെ വാക്കുകളിൽ, വിധിക്ക് പിന്നാലെ സമാനമായ നിയമപരിരക്ഷ തേടി പത്തോളം ദമ്പതികൾ തന്നെ സമീപിച്ചിട്ടുണ്ട്.ബൊളീവിയയിലെ സ്വവർഗ ദമ്പതികളുടെ നിയമപരമായ അവകാശ പോരാട്ടത്തിൽ നിർണായക വഴിത്തിരിവാണ് ഫാബിയാന ജസ്റ്റിനിയാനോയുടെയും സ്‌കാർലെറ്റ് റോച്ചയുടെയും വിവാഹത്തിന് ലഭിച്ച അംഗീകാരം. രാജ്യത്തെ മനുഷ്യാവകാശ-തുല്യനീതി പ്രസ്ഥാനങ്ങൾക്കും ഇത് പുതിയ മുന്നേറ്റത്തിന് വഴിയൊരുക്കുകയാണ്.