തിരുപ്പറംകുണ്ഡ്രം കേന്ദ്രസർക്കാരിന്റെ നിയന്ത്രണത്തിലാക്കണം ; സ്റ്റാലിന് നോട്ടീസ് നൽകി സുപ്രീം കോടതി ; നിർണ്ണായക നീക്കവുമായി ഹിന്ദു ധർമ്മ പരിഷത്ത്

ന്യൂഡൽഹി : തിരുപ്പറംകുണ്ഡ്രം സുബ്രഹ്മണ്യ സ്വാമി ക്ഷേത്രം പുരാവസ്തു വകുപ്പിന്റെ നിയന്ത്രണത്തിലാക്കണമെന്ന് ആവശ്യപ്പെട്ട് സമർപ്പിച്ച ഹർജിയിൽ സുപ്രീം കോടതി തമിഴ്‌നാട് സർക്കാരിനും കേന്ദ്ര സർക്കാരിനും നോട്ടീസ് അയച്ചു .മധുര ആസ്ഥാനമായുള്ള ഹിന്ദു ധർമ്മ പരിഷത്ത് എന്ന സംഘടനയാണ് സുപ്രീം കോടതിയിൽ പുതിയൊരു ഹർജി ഫയൽ ചെയ്തിരിക്കുന്നത്. ഹർജിയിൽ, തിരുപ്പറംകുണ്ഡ്രം സുബ്രഹ്മണ്യ സ്വാമി ക്ഷേത്രം കേന്ദ്ര സർക്കാരിനു കീഴിൽ പ്രവർത്തിക്കുന്ന ആർക്കിയോളജിക്കൽ സർവേ ഓഫ് ഇന്ത്യയുടെ നിയന്ത്രണത്തിൽ കൊണ്ടുവരണമെന്നും കുന്നിൻ മുകളിലുള്ള വിളക്കുകാലിൽ 24 മണിക്കൂറും കത്തുന്ന സ്ഥിരമായ വിളക്ക് സ്ഥാപിക്കണമെന്നും ആവശ്യപ്പെട്ടിട്ടുണ്ട്.ജസ്റ്റിസുമാരായ അരവിന്ദ് കുമാറും വിപുല്‍ എം. പഞ്ചോളിയും അടങ്ങുന്ന സുപ്രീം കോടതി ബെഞ്ചിന് മുമ്പാകെയാണ് ഹര്‍ജി വാദം കേട്ടത് . അതേസമയം, തിരുപ്പറംകുന്ദ്രം സുബ്രഹ്മണ്യ സ്വാമി ക്ഷേത്രം പുരാവസ്തു വകുപ്പിന്റെ നിയന്ത്രണത്തിലാക്കിയാൽ ആരാധനാക്രമങ്ങളിൽ കാര്യമായ മാറ്റങ്ങൾ ഉണ്ടാകുമെന്ന് ചില സാമൂഹിക പ്രവർത്തകർ അഭിപ്രായപ്പെടുന്നു. ദീപസ്തംഭ വിഷയത്തിൽ സുപ്രീം കോടതിയെ സമീപിക്കാൻ തമിഴ്‌നാട് സർക്കാർ ഇതിനകം തീരുമാനിച്ചിട്ടുണ്ടെങ്കിലും, പുതിയ ഹർജിക്കായി നോട്ടീസ് അയച്ചതോടെ വിഷയം ഇപ്പോൾ കൂടുതൽ സങ്കീർണ്ണമാകുകയാണ്.മുരുകന്റെ ആറ് വാസസ്ഥലങ്ങളിൽ ഒന്നായ തിരുപ്പറംകുണ്ഡ്രം ക്ഷേത്രവുമായി ബന്ധപ്പെട്ട് നിലവിൽ മതപരമായ തർക്കം നിലനിൽക്കുന്നുണ്ട്. തിരുപ്പറംകുണ്ഡ്രം കുന്നിൻ മുകളിലുള്ള കാർത്തിക സ്തംഭത്തിൽ വിളക്ക് കൊളുത്താൻ ഹൈക്കോടതി ഉത്തരവിട്ടത് തമിഴ്നാട് സർക്കാർ പാലിക്കാൻ തയ്യാറായിരുന്നില്ല.ഇതിനെതിരെ തമിഴ്നാട് സർക്കാർ അപ്പീൽ നൽകി. പിന്നീട്, ജനുവരി 6 ന് രണ്ടംഗ ബെഞ്ച് കേസ് കേൾക്കുകയും പ്രത്യേക ജഡ്ജി നൽകിയ ഉത്തരവ് ശരിവയ്‌ക്കുകയും ചെയ്തു.ദീപത്തൂണിന് സമീപം സിക്കന്ദർ ബാദുഷ ദർഗയുടെ സാന്നിധ്യമുണ്ടെന്നും, വിളക്ക് തെളിയിക്കുന്നത് ക്രമസമാധാന പ്രശ്‌നം സൃഷ്ടിക്കുമെന്നും തമിഴ്‌നാട് സർക്കാർ വാദിച്ചു. എന്നാൽ, ആ വാദം തള്ളിക്കളഞ്ഞ ജഡ്ജിമാർ, ഒരു പ്രത്യേക സമുദായത്തിനെതിരെ സർക്കാരിന്റെ ഭയം സാങ്കൽപ്പികമാണെന്ന് പറഞ്ഞിരുന്നു