കോടതി സമുച്ചയങ്ങള്ക്കുള്ളില് നിന്ന് പ്രതികളെ അറസ്റ്റ് ചെയ്യുന്നതുമായി ബന്ധപ്പെട്ട് കേരള ഹൈക്കോടതി പുറപ്പെടുവിച്ച കർശന മാർഗ്ഗനിർദ്ദേശങ്ങളില് സുപ്രീം കോടതി സുപ്രധാനമായ ഇളവുകള് അനുവദിച്ചു.ഹൈക്കോടതിയുടെ ചില നിർദ്ദേശങ്ങള് പോലീസിന്റെ നിയമപരമായ അധികാരങ്ങളെ അനാവശ്യമായി പരിമിതപ്പെടുത്തുന്നതാണെന്നും അവ “അമിത നിയന്ത്രണങ്ങള്” (Too restrictive) ആണെന്നും സുപ്രീം കോടതി നിരീക്ഷിച്ചു.സംഭവത്തിന്റെ തുടക്കം2025 ഓഗസ്റ്റ് 19-ന് ആലപ്പുഴ രാമങ്കരി മജിസ്ട്രേറ്റ് കോടതി വളപ്പില് വെച്ച് ഒരു അഭിഭാഷകനെ പോലീസ് മർദ്ദിച്ചുവെന്ന ആരോപണത്തെത്തുടർന്നാണ് കേരള ഹൈക്കോടതി സ്വമേധയാ (Suo Motu) കേസ് എടുത്തത്. അഭിഭാഷകരും പോലീസും തമ്മിലുള്ള സംഘർഷം ഒഴിവാക്കാനായി ജസ്റ്റിസ് എ.കെ. ജയശങ്കരൻ നമ്പ്യാർ, ജസ്റ്റിസ് ജോബിൻ സെബാസ്റ്റ്യൻ എന്നിവരടങ്ങിയ ബെഞ്ച് അന്ന് ചില നിയന്ത്രണങ്ങള് ഏർപ്പെടുത്തിയിരുന്നു. ഇതിനെതിരെ കേരള പോലീസ് ഓഫീസേഴ്സ് അസോസിയേഷൻ നല്കിയ അപ്പീലിലാണ് ഇപ്പോള് വിധി വന്നിരിക്കുന്നത്.ഹൈക്കോടതി പറഞ്ഞതും സുപ്രീം കോടതി മാറ്റിയതുംകോടതി വളപ്പില് അക്രമം തടയാനോ, അല്ലെങ്കില് വാറന്റ് കേസുകളിലെ പിടികിട്ടാപ്പുള്ളികളെ പിടിക്കാനോ മാത്രമേ അറസ്റ്റ് പാടുള്ളൂ എന്നായിരുന്നു ഹൈക്കോടതിയുടെ നിലപാട്. എന്നാല്, ക്രമസമാധാന പാലനത്തിന് ഇത് പ്രായോഗികമല്ലെന്ന് കണ്ട സുപ്രീം കോടതി ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി എന്നിവരടങ്ങിയ ബെഞ്ച് നിയമങ്ങളില് താഴെ പറയുന്ന മാറ്റങ്ങള് വരുത്തി:ഇനിപ്പറയുന്ന സാഹചര്യങ്ങളില് കോടതി വളപ്പിലും പോലീസ് അറസ്റ്റ് അനുവദനീയമാണ്:കോടതി വളപ്പിനുള്ളില് ഒരു കുറ്റകൃത്യം (Cognizable offence) നടക്കുന്നത് തടയാൻ.ഒരു കുറ്റം ചെയ്ത ഉടനെ പ്രതിയെയോ സംശയിക്കുന്നവരെയോ പിന്തുടർന്ന് പിടികൂടാൻ.പ്രതികളോ സംശയിക്കുന്നവരോ കോടതി വളപ്പില് ഒളിച്ചിരിക്കുന്നത് തടയാൻ.ഇത്തരം നടപടികള്ക്കായി ആവശ്യമെങ്കില് നിയമപരമായ ബലം പ്രയോഗിക്കാനും പോലീസിന് അധികാരമുണ്ടാകും.
കോടതി വളപ്പിലെ പോലീസ് അറസ്റ്റ്: ഹൈക്കോടതിയുടെ ‘അമിത നിയന്ത്രണങ്ങളില്’ ഇളവ് വരുത്തി സുപ്രീം കോടതി
