‘ഭാര്യമാരെ തുല്യമായി പരിഗണിക്കുന്നിടത്തോളം കാലം ബഹുഭാര്യത്വം ആകാം’: അലഹബാദ് ഹൈക്കോടതി

ഭാര്യമാരെ തുല്യമായി പരിഗണിക്കുന്നിടത്തോളം കാലം മുസ്ലീം പുരുഷന്മാർക്ക് ഒന്നിലധികം വിവാഹം കഴിക്കാൻ അനുവാദമുണ്ടെന്ന് അലഹബാദ് ഹൈക്കോടതി.ബഹുഭാര്യത്വം ഖുർആൻ അനുവദിക്കുന്നത് ചില “സാധുവായ കാരണങ്ങളാലാണ്” എന്നും, എന്നാല്‍ നിലവില്‍ പുരുഷന്മാർ ഇത് “സ്വാർത്ഥ താല്‍പ്പര്യങ്ങള്‍ക്കായി” “ദുരുപയോഗം ചെയ്യുകയാണെന്നും” കോടതി വിമർശനാത്മകമായി ചൂണ്ടിക്കാട്ടി.മൊറാദാബാദിലെ ഒരു കീഴ്ക്കോടതി പുറപ്പെടുവിച്ച കുറ്റപത്രം, കേസെടുക്കല്‍ (cognizance), സമൻസ് ഉത്തരവ് എന്നിവ റദ്ദാക്കണമെന്ന് ആവശ്യപ്പെട്ട് സമർപ്പിച്ച ഹർജി പരിഗണിക്കവെയാണ് ജസ്റ്റിസ് അരുണ്‍ കുമാർ സിംഗ് ദേശ്‌വാളിൻ്റെ സിംഗിള്‍ ബെഞ്ച് ഈ സുപ്രധാന നിരീക്ഷണങ്ങള്‍ നടത്തിയത്.2020-ലാണ് ഈ കേസിന് ആസ്പദമായ സംഭവം. ഫുർഖാൻ എന്നയാള്‍ തൻ്റെ ആദ്യ ഭാര്യയെക്കുറിച്ചുള്ള വിവരം മറച്ചുവെച്ച്‌ തന്നെ വിവാഹം കഴിച്ചു എന്നാരോപിച്ച്‌ ഒരു സ്ത്രീ പരാതി നല്‍കി. വിവാഹസമയത്ത് ഫുർഖാൻ തന്നെ ബലാത്സംഗം ചെയ്തതായും അവർ ആരോപിച്ചു. ഈ പരാതിയുടെ അടിസ്ഥാനത്തില്‍ മൊറാദാബാദ് പോലീസ് സ്റ്റേഷനില്‍ കേസെടുക്കുകയും ഫുർഖാനുള്‍പ്പെടെ മൂന്നു പ്രതികള്‍ക്ക് സമൻസ് അയക്കുകയും ചെയ്തു.മൊറാദാബാദ് കോടതിയില്‍ ഫുർഖാൻ്റെ അഭിഭാഷകൻ വാദിച്ചത്, പരാതിക്കാരിയായ സ്ത്രീ ഫുർഖാനുമായി നേരത്തെയുണ്ടായിരുന്ന ബന്ധത്തിന് ശേഷമാണ് അദ്ദേഹത്തെ വിവാഹം ചെയ്തതെന്ന് സമ്മതിച്ചിട്ടുണ്ട് എന്നാണ്. ഇന്ത്യൻ ശിക്ഷാ നിയമം (ഐപിസി) സെക്ഷൻ 494 പ്രകാരം (ഒരു വിവാഹം നിലനില്‍ക്കെ മറ്റൊരു വിവാഹം ചെയ്യുന്നത്) കുറ്റകൃത്യമാകണമെങ്കില്‍ രണ്ടാമത്തെ വിവാഹം അസാധുവായിരിക്കണം എന്നും അദ്ദേഹം വാദിച്ചു.മുസ്ലീം പുരുഷന്മാർക്ക് നാല് ഭാര്യമാർ വരെ അനുവദനീയമായതിനാല്‍ ഈ കേസില്‍ ഫുർഖാൻ നിയമപരമായി കുറ്റം ചെയ്തിട്ടില്ലെന്ന് ജസ്റ്റിസ് ദേശ്‌വാള്‍ നിരീക്ഷിച്ചു. വിവാഹം, വിവാഹമോചനം തുടങ്ങിയ വിഷയങ്ങള്‍ 1937-ലെ ശരീഅത്ത് ആക്‌ട് അനുസരിച്ചാണ് തീരുമാനിക്കേണ്ടതെന്നും അദ്ദേഹം വ്യക്തമാക്കി.ഫുർഖാൻ്റെ രണ്ട് ഭാര്യമാരും മുസ്ലീങ്ങളായതിനാല്‍ അദ്ദേഹത്തിൻ്റെ രണ്ടാം വിവാഹം സാധുവാണെന്ന് അലഹബാദ് ഹൈക്കോടതി 18 പേജുള്ള വിധിന്യായത്തില്‍ വ്യക്തമാക്കി. ഈ കേസ് അടുത്ത വാദം കേള്‍ക്കുന്നതിനായി കോടതി ലിസ്റ്റ് ചെയ്തിട്ടുണ്ട്. ബഹുഭാര്യത്വം ഇസ്ലാം അനുവദിക്കുന്നുണ്ടെങ്കിലും, അത് പാലിക്കേണ്ടത് തുല്യനീതി ഉറപ്പാക്കിക്കൊണ്ടായിരിക്കണം എന്ന പ്രധാനപ്പെട്ട ഒരു നിരീക്ഷണമാണ് ഈ വിധിയിലൂടെ അലഹബാദ് ഹൈക്കോടതി നടത്തിയിരിക്കുന്നത്.