തിരുപ്പരങ്കുണ്ട്രം കുന്നിലെ കൽത്തൂണിൽ ദീപം കൊളുത്താം; ‘രാഷ്ട്രീയ അജണ്ട’ തള്ളി മദ്രാസ് ഹൈക്കോടതി

മദ്രാസ്: മധുരയിലെ തിരുപ്പരങ്കുണ്ട്രം കുന്നിലെ കൽത്തൂണിൽ ദീപം കൊളുത്താം എന്ന സിംഗിൾ ബെഞ്ച് ഉത്തരവ് ശരിവെച്ച് മദ്രാസ് ഹൈക്കോടതി. തമിഴ്‌നാട്ടിലെ ഡിഎംകെ സർക്കാരിന്റെ താൽപര്യത്തിനെതിരായാണ് ചൊവ്വാഴ്ച മദ്രാസ് ഹൈക്കോടതിയുടെ (മധുര ബെഞ്ച്) വിലയിരുത്തൽ വന്നത്. ജസ്റ്റിസ് ജി. ജയചന്ദ്രനും ജസ്റ്റിസ് കെ.കെ. രാമകൃഷ്ണനും അടങ്ങുന്ന ഡിവിഷൻ ബെഞ്ച്, സിംഗിൾ ജഡ്ജിയുടെ ഉത്തരവ് റിസ് ജുഡിക്കേറ്റ പ്രകാരം തടസ്സപ്പെടുത്താനാവില്ലെന്ന് വിധിച്ചു.ഹിന്ദു, മുസ്ലിം മതവിശ്വാസികൾ ഒരുപോലെ പുണ്യസ്ഥലമായി കരുതുന്ന തിരുപ്പരങ്കുണ്ട്രം മലയുടെ മുകളിൽ സിക്കന്ദർ ബാദുഷ ദർഗയ്ക്കടുത്തുള്ള കൽത്തൂണിൽ ദീപം കൊളുത്തുന്നതുമായി ബന്ധപ്പെട്ട വിഷയത്തിലാണ് കോടതി തീരുമാനം അറിയിച്ചിരിക്കുന്നത്. നിയമ-ക്രമ പ്രശ്‌നങ്ങളും സൈറ്റിന്മേലുള്ള അവകാശവാദങ്ങളും കാരണം സർക്കാർ ദീപം കൊളുത്തുന്നതിനെ എതിർത്തിരുന്നു.തൃക്കാർത്തിക ദിവസം കൽത്തൂണിൽ വിളക്കുകൊളുത്താൻ ജസ്റ്റിസ് ജി.ആർ. സ്വാമിനാഥന്റെ ബെഞ്ച് നൽകിയ അനുമതിയാണ് ഹൈക്കോടതി അംഗീകരിച്ചിരിക്കുന്നത്. വിളക്ക് തെളിയിക്കുന്നതിനെ നിരോധിക്കുന്ന ഏതെങ്കിലും ആഗമശാസ്ത്രത്തെക്കുറിച്ച് തെളിവുകളൊന്നും ഹാജരാക്കാൻ സംസ്ഥാന സർക്കാരിന്റെ അധികാരികൾക്കോ ദർഗ്ഗ ഉൾപ്പെടെയുള്ള അപ്പീൽ കക്ഷികൾക്കോ കഴിഞ്ഞില്ലെന്ന് ബെഞ്ച് ചൂണ്ടിക്കാട്ടി.സംസ്ഥാനത്തിന്റെ എതിർപ്പുകൾ ശക്തമായി തള്ളിക്കളഞ്ഞുകൊണ്ട്, ഒരു വർഷത്തിൽ ഒരു പ്രത്യേക ദിവസം കല്ലുവിളക്കിൽ വിളക്ക് തെളിയിക്കാൻ ദേവസ്ഥാനത്തിന്റെ പ്രതിനിധികളെ അനുവദിക്കുന്നത് പൊതു സമാധാനത്തെ തടസ്സപ്പെടുത്തുമെന്ന വാദം ‘പരിഹാസ്യവും വിശ്വസിക്കാൻ പ്രയാസവുമാണ്’ എന്ന് ബെഞ്ച് വിശേഷിപ്പിച്ചു.ഇത്തരം തടസ്സങ്ങൾ ‘സംസ്ഥാനം തന്നെ സ്‌പോൺസർ ചെയ്താൽ’ മാത്രമേ സംഭവിക്കൂ എന്നും, രാഷ്ട്രീയ ലക്ഷ്യങ്ങൾക്കായി ഒരു സംസ്ഥാനം അത്തരം നിലയിലേക്ക് താഴ്ന്നുപോകുമെന്ന് പ്രതീക്ഷിക്കുന്നില്ലെന്നും കോടതി നിരീക്ഷിച്ചു. സിംഗിൾ ബെഞ്ചിന്റെ ഉത്തരവിനെ ചോദ്യം ചെയ്തുകൊണ്ട് സംസ്ഥാനം, പോലീസ്, ദർഗ്ഗ, തമിഴ്നാട് വഖഫ് ബോർഡ് എന്നിവയാണ് ഡിവിഷൻ ബെഞ്ചിനെ സമീപിച്ചത്.ഭക്തർക്ക് വിളക്ക് തെളിയിക്കാൻ നിയമപരമായ അവകാശമില്ലെന്നും, ദീർഘകാലമായുള്ള ആചാരങ്ങളെ മാറ്റാൻ ആർട്ടിക്കിൾ 226 പ്രകാരമുള്ള അധികാരങ്ങൾ ഉപയോഗിക്കാനാവില്ലെന്നും സംസ്ഥാനം വാദിച്ചു. മധുര കളക്ടറും പോലീസ് കമ്മീഷണറും സിംഗിൾ ബെഞ്ചിന്റെ ഉത്തരവിനെ എതിർത്തു. ദീപസ്തംഭം ഒരു ‘സങ്കൽപ്പം’ ആണെന്നും,സിംഗിൾ ബെഞ്ചിന്റെ നിർദ്ദേശങ്ങൾ ഈ മേഖലയിലെ സമാധാനത്തെ തടസ്സപ്പെടുത്തിയേക്കാമെന്നും അവർ വാദിച്ചു. ഈ വാദങ്ങൾ തള്ളിക്കളഞ്ഞുകൊണ്ടാണ് ഡിവിഷൻ ബെഞ്ച് സിംഗിൾ ബെഞ്ചിന്റെ ഉത്തരവ് ശരിവെച്ചത്. തിരുപ്പരങ്കുണ്ട്രം കുന്നുകളിലെ കൽത്തൂണിൽ ദീപം തെളിയിക്കുന്നതിനുള്ള വഴി വീണ്ടും തുറന്നിരിക്കുകയാണ്.