കൗമാര പ്രണയങ്ങൾക്ക് നിയമപരിരക്ഷ; പോക്സോയിൽ ‘റോമിയോ-ജൂലിയറ്റ്’ ചട്ടം കൊണ്ടുവരാൻ സുപ്രീം കോടതിയുടെ ചരിത്രപരമായ നിർദ്ദേശം

ന്യൂഡൽഹി: പരസ്പര സമ്മതത്തോടെയുള്ള കൗമാര പ്രണയങ്ങളെ പോക്സോ (POCSO) നിയമത്തിന്റെ കഠിനമായ ശിക്ഷാ നടപടികളിൽ നിന്ന് ഒഴിവാക്കാൻ ‘റോമിയോ-ജൂലിയറ്റ് ചട്ടം’ (Romeo-Juliet Clause) കൊണ്ടുവരണമെന്ന സുപ്രധാന നിർദ്ദേശവുമായി സുപ്രീം കോടതി. പ്രായപൂർത്തിയാകാത്ത രണ്ട് കൗമാരക്കാർ തമ്മിലുള്ള പ്രണയബന്ധങ്ങളെ ലൈംഗികാതിക്രമങ്ങളിൽ നിന്ന് വേർതിരിച്ചു കാണണമെന്നും ഇത്തരം കേസുകളിൽ നിയമം ദുരുപയോഗം ചെയ്യുന്നത് തടയണമെന്നും കോടതി കേന്ദ്ര സർക്കാരിനോട് ആവശ്യപ്പെട്ടു.എന്താണ് ‘റോമിയോ-ജൂലിയറ്റ്’ ചട്ടം?പല വിദേശ രാജ്യങ്ങളിലുമുള്ള ഈ നിയമം അനുസരിച്ച്, പ്രണയത്തിലായ രണ്ട് വ്യക്തികൾ തമ്മിലുള്ള പ്രായവ്യത്യാസം കുറവാണെങ്കിലും അവരിൽ ഒരാൾക്ക് പ്രായപൂർത്തിയായിട്ടില്ലെങ്കിലും ആ ബന്ധം പരസ്പര സമ്മതത്തോടെയുള്ളതാണെങ്കിൽ കർശനമായ ക്രിമിനൽ നടപടികളിൽ നിന്ന് ഇളവ് നൽകും. കൗമാര പ്രായത്തിലെ പ്രണയങ്ങളെ ചൂഷണമായി കാണാതെ, സ്വാഭാവികമായ വികാരമായി പരിഗണിക്കാനാണ് ഈ നീക്കം.കുട്ടികളെ സംരക്ഷിക്കാൻ നിർമ്മിച്ച പോക്സോ നിയമം പലപ്പോഴും വ്യക്തിപരമായ പകപോക്കലിനും കുടുംബങ്ങൾ തമ്മിലുള്ള തർക്കങ്ങൾ തീർക്കാനുമുള്ള ആയുധമായി മാറുന്നുണ്ടെന്ന് ജസ്റ്റിസുമാരായ സഞ്ജയ് കരോൾ, എൻ. കോടീശ്വർ സിങ് എന്നിവരടങ്ങിയ ബെഞ്ച് നിരീക്ഷിച്ചു. വ്യാജ പരാതികൾ നൽകി കൗമാരക്കാരുടെ ജീവിതം തകർക്കുന്നവർക്കെതിരെ നിയമനടപടി വേണമെന്നും കോടതി നിർദ്ദേശിച്ചു.