ടിപി ചന്ദ്രശേഖരൻ വധക്കേസില് ശിക്ഷിക്കപ്പെട്ട് ജയിലില് കഴിയുന്ന പ്രതി കൊടിസുനിയെ ജയില് മാറ്റണമെന്ന് ആവശ്യപ്പെട്ട് അമ്മ ഹൈക്കോടതിയില്.തവനൂർ ജയിലില് നിന്നും കണ്ണൂരിലേക്ക് മാറ്റണമെന്നാണ് കൊടിസുനിയുടെ അമ്മയുടെ ആവശ്യം. ഹർജിയില് കോടതി സർക്കാരിൻ്റെ വിശദീകരണം തേടി. കേസില് കൊടിസുനി ഉള്പ്പെടെയുള്ള പ്രതികളുടെ ജയിലിലെ കുറ്റകൃത്യങ്ങള് വ്യക്തമാക്കുന്ന റിപ്പോർട്ടിന്റെ അടിസ്ഥാനത്തിലായിരുന്നു കൊടി സുനിയെ തവനൂരിലെ ജയിലിലേക്ക് മാറ്റിയത്.ടിപി ചന്ദ്രശേഖരൻ കൊലക്കേസില് ശിക്ഷിക്കപ്പെട്ട് ജയിലില് കഴിയുന്ന കുറ്റവാളികള്ക്ക് ജയിലിനുള്ളിലും ലഹരി വില്പനയെന്ന് ജയില് സൂപ്രണ്ടിന്റെ അന്വേഷണ റിപ്പോർട്ട്. കേസിലെ മുഖ്യപ്രതികളായ കൊടി സുനിയും കിർമാണി മനോജും ലഹരിവില്പനയുടെ കണ്ണികളാണെന്നാണ് ജയില് സൂപ്രണ്ടിന്റെ റിപ്പോർട്ടില് വിശദീകരിക്കുന്നത്. ജയിലിനകത്തും പുറത്തും ലഹരി ഉല്പ്പന്നങ്ങള് ഉപയോഗിക്കുന്നതിന് പുറമെ കൊടി സുനിയും സംഘവും വില്പ്പനയും നടത്തുന്നുവെന്നാണ് ജയില് വകുപ്പിന്റെ കണ്ടെത്തല്. ജയിലില് കൊടി സുനി നിരന്തരം അച്ചടക്കലംഘനം കാണിക്കുന്നുവെന്നും റിപ്പോർട്ടില് പറയുന്നു.അതിനിടെ ടിപി ചന്ദ്രശേഖരൻ വധക്കേസിലെ പ്രതികളെ വിട്ടയക്കുന്നതുമായി ബന്ധപ്പെട്ട് ജയില് വകുപ്പ് അസാധാരണ നീക്കങ്ങള് നടത്തുന്നതിന്റെ സൂചനകള് പുറത്ത് വന്നിരുന്നു. ടിപി വധക്കേസിലെ പ്രതികളെ ‘വിടുതല്’ ചെയ്യുന്നതില് ഏതെങ്കിലും തരത്തിലുള്ള സുരക്ഷാപ്രശ്നമുണ്ടോയെന്ന് ചോദിച്ച് ജയില് ആസ്ഥാനത്ത് നിന്ന് ജയില് സൂപ്രണ്ടുമാര്ക്ക് അയച്ച കത്താണ് പുറത്ത് വന്നത്. പ്രതികളെ ജയിലില് നിന്ന് എന്നന്നേക്കുമായി വിട്ടയക്കുന്നതിനാണോ അതോ പരോളിനെ കുറിച്ചാണോ എന്ന കാര്യം കത്തില് പറയുന്നില്ല. വിടുതല്’ എന്ന വാക്കാണ് ഉപയോഗിച്ചിരിക്കുന്നത്. 20 വർഷത്തേക്കു ശിക്ഷായിളവ് നല്കരുതെന്ന ഹൈക്കോടതി വിധി നിലനില്ക്കെയാണ് സർക്കാർ ഇടപെടല്.നീക്കം പുറത്ത് വന്നതോടെ പ്രതികളെ വിട്ടയക്കാനുള്ള കത്തല്ലെന്ന വിശദീകരണവുമായി എ ഡി ജി പി ബല്റാംകുമാര് ഉപധ്യായ രംഗത്തെത്തി. മാഹി ഇരട്ടക്കൊല കേസിലും ടി പി വധക്കസിലെ മുഖ്യപ്രതികളായ കൊടി സുനി ഉള്പ്പെടെയുള്ളവർ ഉള്പ്പെട്ടിരുന്നു. മാഹി ഇരട്ടക്കൊലക്കേസില് ടി പി കൊലക്കേസിലെ പ്രതികളെയടക്കം കോടതി വെറുതെ വിട്ടിരുന്നു. ഈ സാഹചര്യത്തിലാണ് സുരക്ഷാ പ്രശ്നമുണ്ടോയെന്ന് അന്വേഷിച്ച് കത്ത് അയച്ചതെന്നാണ് വിശദീകരണം.
ടിപി ചന്ദ്രശേഖരൻ വധക്കേസ്: കൊടിസുനിയെ ജയില് മാറ്റണമെന്ന് ആവശ്യപ്പെട്ട് അമ്മ ഹൈക്കോടതിയില്
