സ്വകാര്യ സർവകലാശാലകൾ 5 വർഷത്തെ കണക്കുകൾ ഹാജരാക്കണമെന്ന് സുപ്രീം കോടതി

ന്യൂഡൽഹി: സ്വകാര്യ സർവകലാശാലകളെ ലാഭമുണ്ടാക്കുന്ന സ്ഥാപനങ്ങളായി പ്രവർത്തിക്കാൻ അനുവദിക്കില്ലെന്ന് വ്യക്തമാക്കി സുപ്രീം കോടതി. രാജ്യത്തുടനീളമുള്ള സ്വകാര്യ സർവകലാശാലകളോട് കഴിഞ്ഞ അഞ്ച് വർഷത്തെ ഓഡിറ്റ് ചെയ്ത സാമ്പത്തിക രേഖകൾ, ഫണ്ട് വിനിയോഗം, ഫീസ് ഘടന, മിച്ച തുകയുടെ നിക്ഷേപങ്ങൾ, വിദ്യാഭ്യാസപരമായ ചുമതലകളിൽ നേരിട്ട് ഏർപ്പെടാത്ത വ്യക്തികൾക്ക് നൽകിയ പണം എന്നിവയുടെ വിശദാംശങ്ങൾ വെളിപ്പെടുത്താൻ കോടതി നിർദേശിച്ചു.ജസ്റ്റിസ് അഹ്സാനുദ്ദീൻ അമാനുല്ല, ജസ്റ്റിസ് എൻ.വി. അഞ്ചാരിയ എന്നിവരടങ്ങിയ ബെഞ്ചാണ് സുപ്രധാന ഉത്തരവ് പുറപ്പെടുവിച്ചത്. സർവകലാശാലകളുടെ വിഭവങ്ങൾ വിദ്യാഭ്യാസേതര ആവശ്യങ്ങൾക്കായി മാറ്റാൻ പാടില്ലെന്ന് ബെഞ്ച് നിരീക്ഷിച്ചു.സാമ്പത്തിക വിവരങ്ങൾ സമർപ്പിക്കണം: കേന്ദ്ര സർക്കാരും സംസ്ഥാനങ്ങളും കേന്ദ്രഭരണ പ്രദേശങ്ങളും ബന്ധപ്പെട്ട സർവകലാശാലകളിൽ നിന്നും കോളേജുകളിൽ നിന്നും വിവരങ്ങൾ ശേഖരിച്ച്, ചീഫ് സെക്രട്ടറിമാർ മുഖേന ആറ് ആഴ്ചയ്ക്കകം സത്യവാങ്മൂലം സമർപ്പിക്കണം.ഓരോ കോഴ്‌സിലെയും വിദ്യാർഥി പ്രവേശന നടപടികൾ, പ്രവേശനത്തിന്റെ ചുമതലയുള്ളവർ, ചോദ്യപേപ്പർ തയ്യാറാക്കൽ, പരീക്ഷാ നടത്തിപ്പ്, ഉത്തരം കടലാസ് മൂല്യനിർണയം, ഫണ്ട് കൈകാര്യം ചെയ്യൽ എന്നിവയിലെ മാനേജ്‌മെന്റിന്റെ പങ്ക് വ്യക്തമാക്കണം.പ്രവേശന സമയത്തും കോഴ്‌സ് കാലയളവിലും പിരിക്കുന്ന ഫീസുകൾ, ഡെവലപ്‌മെന്റ് ഫണ്ട് അല്ലെങ്കിൽ പ്രത്യേക പരിപാടികൾക്കായി പിരിക്കുന്ന തുക, മിച്ച തുകയുടെ ഉപയോഗവും നിക്ഷേപങ്ങളും എന്നിവയുടെ വിവരങ്ങൾ പ്രത്യേകം നൽകണം.ജീവനക്കാരുടെ നിയമന രീതി, ശമ്പള വ്യവസ്ഥകൾ, സേവന നിബന്ധനകൾ എന്നിവ വെളിപ്പെടുത്തണം. കൂടാതെ, 2025 ജനുവരി മുതൽ അധ്യാപകർക്ക് ക്ലാസുകൾ അനുവദിച്ചതിന്റെയും അവ യഥാർത്ഥത്തിൽ എടുത്തതിന്റെയും വിവരങ്ങളും സമർപ്പിക്കേണ്ടതുണ്ട്.ബാർ കൗൺസിൽ, എൻ.എം.സി, ഫാർമസി കൗൺസിൽ തുടങ്ങിയ അംഗീകാരം നൽകുന്ന ഏജൻസികൾ കഴിഞ്ഞ അഞ്ച് വർഷത്തെ പരിശോധനാ വിവരങ്ങളും ഫാക്കൽറ്റി വിവരങ്ങളും ഉൾപ്പെടുത്തി ചെയർമാൻ/പ്രസിഡന്റ് തലത്തിൽ വ്യക്തിഗത സത്യവാങ്മൂലം നൽകണം.